Samsung និង LG វាយកំទេច ដៃគូប្រកួត ឲ្យបាត់បង់ ទីផ្សារលក់ទូរទស្សន៍ LCD

ក្រុមហ៊ុន Samsung (005930) ប្រហែលជាកំពុងតែទទួល បានការចាប់អារម្មណ៍យ៉ាងច្រើនបំផុត សម្រាប់ផលិតផលស្មាតហ្វូន ក្នុងពេលបច្ចុប្បន្ននេះ ប៉ុន្តែក្រុមហ៊ុនកូរ៉េខាងត្បូងនេះ ក៏កំពុងតែដំណើរការលក់ទូរទស្សន៍ LCD បានល្អគួរសម នៅក្នុងទីផ្សារ LCD TV ផងដែរ។

យោងតាមទិន្នន័យចុងក្រោយ ពីក្រុមស្រាវជ្រាវ iSuppli បានឲ្យដឹងថា ក្រុមហ៊ុន Samsung បានចេញលក់ទូរទស្សន៍ LCD ៨,២លានគ្រឿង នៅក្នុងត្រីមាសទី១ ឆ្នាំ ២០១២ ដោយក្តាប់បានទីផ្សារ LCD TV ចំនួន១៩ភាគរយ និងកើនឡើងជាង កាលពីត្រីមាសទី១ ឆ្នាំ២០១១កន្លងទៅ មានត្រឹម១៨ភាគរយ ។

បន្ទាប់ពីក្រុមហ៊ុន Samsung ក្រុមហ៊ុនកូរ៉េខាងត្បូងមួយទៀត គឺក្រុមហ៊ុន LG ក៏ជាក្រុមហ៊ុនទទួលបានការគាំទ្រ យ៉ាងច្រើនផងដែរ ក្នុងការលក់ទូរទស្សន៍ LCD ដោយបានចេញលក់ទូរទស្សន៍ LCD បានចំនួន ៥,៨លានគ្រឿង ក្តាប់បានទីផ្សារ លក់ទូរទស្សន៍ចំនួន ១៣ភាគរយ ទូទាំងពិភពលោក កាលពីត្រីមាសទី១ឆ្នាំ ២០១២នេះ។

ក្រុមស្រាវជ្រាវ iSuppli ផងដែរ រាយការណ៍ថា Samsung និង LG គឺជាក្រុមហ៊ុនតែពីរប៉ុណ្ណោះ ដែលទទួលបានប្រាក់ចំណូល ពីការធ្វើពាណិជ្ជកម្ម លក់ទូរទស្សន៍ LCD របស់ពួកគេ ជាមួយដៃគូប្រកួតប្រជែងរបស់ពួកគេ ដូចជាក្រុមហ៊ុន Sony (SNE), Toshiba (6502) និង Sharp (7653) កំពុងតែខាតបង់យ៉ាងច្រើន ពីការចែកចាយទូរទស្សន៍ LCD របស់ពួកគេ។ ចំពោះការចេញលក់ទូរទស្សន៍ LCD ទាំងអស់ មានការធ្លាក់ពីមួយ ឆ្នាំទៅមួយឆ្នាំ ដែលកាលពីត្រីមាសទី១ ឆ្នាំ២០១១ ធ្លាក់ចុះ ៤៤,៦លានគ្រឿង ហើយត្រីមាសទី១ ឆ្នាំ ២០១២ធ្លាក់ចុះ ៤៤,៤ភាគរយ ៕