ពាក្យ​ចចាមអារ៉ាម​កន្លង​មក​ដែល​ថា Google គ្រោង​បង្កើត Tablet Nexus ឥឡូវ​នេះ​ក្លាយ​ជា​ការពិត​ហើយ ព្រោះ​ក្រុមហ៊ុន​រុករក​ដ៏​ធំ​មួយ​នេះ​ទើប​តែ​​ប្រកាស Tablet ដំបូង​បំផុត​របស់​ខ្លួន​ដែល​​មាន​ឈ្មោះ Nexus 7 ផលិត​ដោយ​ក្រុមហ៊ុន ASUS ក្នុង​សន្និសីទ Google I/O ប្រចាំ​ឆ្នាំ​នៅ សាន់ហ្រ្វាន់ស៊ីស្កូ រដ្ឋ​កាលីហ្វញ៉ា​កាល​ពី​ថ្ងៃ​ទី ២៧ មិថុនា ម្សិលមិញ​នេះ។
Tablet ដំបូង​របស់ Google នេះ​នឹង​ភ្ជាប់​មក​ជាមួយ​ប្រព័ន្ធ​ប្រតិបត្តិការAndroid 4.1 ជំនាន់​ចុង​ក្រោយ​ Jelly Bean, អេក្រង់​ទំហំ ៧អ៊ីញ មាន resolution 1280 x 800 pixel, ប្រើ CPU ប្រភេទ quad-core Tegra 3, GPU ប្រភេទ GeFore 12-core, គ្មាន​កាមេរ៉ា​ក្រោយ​តែ​មាន​កាមេរ៉ា​មុខ​ទំហំ 1.2MP, Bluetooth, NFC, RAM ទំហំ 1GB, វិមាត្រ ១៩៨,៥ x ១២០ x ១០,៥ ម.ម, ទម្ងន់ ៣៤០ក្រាម និង​ថ្ម​កាន់​រយៈពេល ៩ម៉ោង។
ក្រៅ​ពី​លក្ខណៈ​សម្បត្តិ​ខាង​លើ Tablet ដដែល​នេះ​បាន​រចនា​ឡើង​សម្រាប់​ប្រើ​ជាមួយ Google Play និង​មាន​កម្មវិធី​មួយ​ចំនួន​បាន​ដំឡើង​រួច​ជា​ស្រេច​ដូច​ជា Chrome និង Google Maps ជំនាន់​ចុង​ក្រោយ​ដែល​អាច​ប្រើ​ដោយ​មិន​បាច់​ភ្ជាប់​អ៊ីនធឺណិត(offline map)ជា​ដើម។
Nexus 7 គ្រោង​ចេញ​លក់​នៅ​សហរដ្ឋអាមេរិក, កាណាដា និង​អូស្ត្រាលី នា​ពាក់កណ្ដាល​ខែ​កក្កដា​ខាង​មុខ​នេះ។ តែ​អតិថិជន​អាច​កុម្ម៉ង់​ទិញ​មុន​ពី​ឥឡូវ​នេះ​បាន​ជាមួយ​នឹង​តម្លៃ​ខុស​គ្នា​តាម​ទំហំ​ដូច​ជា៖ ទំហំ 8GB តម្លៃ ១៩៩ដុល្លារ​អាមេរិក និង 16GB តម្លៃ ២៤៩​ដុល្លារ​អាមេរិក។
សូមបន្តតាមដានវីដេអូឃ្លិបខាងក្រោម៖
តម្លៃ រូបរាង និង​លក្ខណៈ​សម្បត្តិ​ប៉ុន​នេះ​ទទួល​យក​បាន​អត់?